Monthly Archives: November, 2016

📮HAMARI NAMAZ RASOOL’ALLAH SALLALLAHU ALAIHI WASALLAM KE TAREEQE PAR HAI BHI YA NAHI❓

📮HAMARI NAMAZ RASOOL’ALLAH SALLALLAHU ALAIHI WASALLAM KE TAREEQE PAR HAI BHI YA NAHI❓

♻Bismillahhirrahmanirrahim ♻

Ye sawal har us shaks ke dil me hona chahiye jo Allah ta’ala ki ibadat karta hai aur Rasool’Allah sallallaho alaihi wasallam ke tareeqe pe chalna chahta hai ke kya hamara namaz ka tareeqa jo ham padh rahe hai wo Nabwi tareeqa hai bhi ya nahi ❓
Ham namaz to ada karte hai lekin kabhi ye sawal hamare zahen me nahi ata hai. Bas jaisa dekhte sunte chale aarahe hai waise hi karte chale jaarahe hai. Kisi ke ghar me aise namaz padhi jati hai to kisi ke ghar me waise namaz padhi jati hai jabki namaz ka tareeqa to koi ek hi hoga. Jaise Roza ibadat hai, haj ibadat hai in sab ke tareeqe ek hai to namaz ka tareeqa kaise alag alag-alag ho sakta hai. Jo jaise bhi apne gharwalo ko dekhta hai waise namaz padhna shuru kardeta hai bhale hi wo tareeqa sahi na ho, aur jab unse kaha jata hai ye andhe pairwi chhod kar Quran o Sunnat par aao to wo kahte hai ke hamne jaise apne bado ko paya ham waisa hi karenge.Isi baat ko Allah Ta’ala ne quran me wazeh farmaya diya hai.

🔴Farman e ILAHI

✔”Aur jab un se kaha jaata hai ke Allah ta’ala ne jo ehkaam naazil farmaaye hai un ki taraf aur Rasool ki taraf rujo karo, to kehte hai ke  hum ko wahi kaafi hai jis par hum ne apne bado ko paaya, kya agar-che in ke bade na kuch samajh rakhte ho aur na hidaayat rakhte ho. ”
📘(Surah – 5 : 104)

Ye baat wazeh(clear) hai ke namaz ek ibadat hai aur ibaadato ka talluq qurbaat(taqarrub e ilahi ke zariye) se hai aur insani zahen o dimagh me itni salahiyat nahi hai ke wo shari’at ki madad ke baghair ye malum kar sake ke kaun si chiz qurbat(qareebi hasil karna) hai aur kaun si nahi, agar aisa mumkin hota to na Rasoolo ki besat ki zarurat hoti aur na hi kitabo ke utaarne aur naazil karne ki, isliye yaha

✔”Allah ko usi tarah yaad karo jaise usne tum ko bataya hai”
📗(Al Baqara :239)

Ka usool chalta hai, isliye jis tarah salaah(namaz) ki azmat o ahmiyat se waaqfiyat aur uske ehtemaam ki fikr ki zarurat hai usi tarah ye maloom karna bhi zaruri hai ke namaz ki adayegi ka Nabvi Tareeqa kya hai❓

Aap sallallaho alaihi wasallam ne jis tarah namaz ki ahmiyat ki wazaahat ki aur uski adayegi ki takeed o talqeen farmaai, usi tarah logo ko namaz ki adayegi ke tareeqe se bhi aagaah farmaya chunache ek martabah Rasool’Allah sallallaho alaihi wasallam ne minber par namaz ki imamat farmayi Qiyaam aur ruku minber par kiya (niche utar kar sajdah kiya phir mimber par chadh gaye) aur namaz se farigh hokar farmaya :
“Maine aisa isliye kiya ke tum meri iqtida kar sako aur meri namaz ki kaifiyat(tareeqa) maloom kar sako. ”
📚(Bukhari : 971, Muslim : 544)

Amali taleem ke sath zabani taur par bhi Rasool’Allah sallallaho alaihi wasallam ne takeed farmayi:
” Tum usi tarah namaz adaa karo jis tarah mujhe adaa karte hue dekhte ho.”
📚(Bukhari  : 631, Muslim :544)

Iss tarah wahi namaz Allah ke nazdeek maqbool(qabil e qubool) hogi jo tareeqa e Rasool sallallaho alaihi wasallam ke mutabiq adaa ki gayi ho.
Adaayegi e namaz ke silsile me tareeqa e Rasool’Allah sallallaho alaihi wasallam ki itteba o pairvi ki isi ahmiyat ke pesh e nazar har daur me Ulemaaye Ummat ne iss mauzoo par kitabe likhi hain.
Unhi kitabo se Quran o sunnat ki roshni me Namaz e Nabwi ki ek nazar apke samne pesh ki ja rahi hai taki aap jan sake ke Hamare Rasool Allah Sallallahu Alailhi Wa Sallam ka namaz ka tareeqa kya tha❓

🎙Namaz e nabwi janne ke liye Is silsile se jude rahe aur hamari agli series zarur padhe jiska topic hai. ⬇
📮NAMAZ E NABWI
Coming 🔜 In shaa’a Allah

Advertisements

📮️ENGG. ALI MIRZA KI HAQEEQAT

✔️ENGG. ALI MIRZA KI HAQEEQAT

👇🏻👇🏻👇🏻👇🏻👇🏻👇🏻👇🏻👇🏻👇🏻

http://www.islamicleaks.com/2015/08/kazzab-engineer-muhammed-ali-mirza-ki.html

Share to all

📮ZAKHM KI BINA PAR AGAR PATTI BANDHI HO TO GHUSL AUR WUZU KIS TARAH KARE❓

📮ZAKHM KI BINA PAR AGAR PATTI BANDHI HO TO GHUSL AUR WUZU KIS TARAH KARE❓

Bismillahhirrahmanirrahim

Aksar log zakhm hone ki wajah se ya zakhm pe patti ya plaster hone ki wajah se wuzu aur ghusl karne me pareshani uthate hain yaha tak ki kabhi kabhi kam ilmi ki wajah se logo ki namaz to qaza hoti hi hai to kabhi kabhi ghusl bhi nahi le paate. Jab ke Allah ne is deen me bahut si aasaaniya rakhi hai bas hame unse wakif hona padega. Allah ta’ala Quran me farmata hai

🔴Farman e ILAHI

“……. haan agar tum bimaar ho ya safar ki haalat mein ho ya tum mein se koi haajat zaruri se faarigh ho kar aaya ho, ya tum aurto se mile ho aur tumhe paani na mile to tum paak mitti se tayammum karlo, usey apne chehro aur haatho par mal lo, Allah ta’ala tum par kisi qism ki tangi daalna nahi chaahta, balke uska iraada tumhe paak karne ka aur tumhe apni bharpoor nemat dene ka hai, taki tum shukar ada karte raho”
📕(Surah Maidah – 5 : 6)

🔴Sheikh ibn Usaimeen Rahimahullah likhte hain :

✔Ulemaa kiraam kahte hain zakhm ya to khula(uncovered) hua hoga ya phir dhaka(covered) hua.
Agar zakhm khula ho to usey dhona wajib hai, aur agar mushkil ho to phir us pas masah kiya jaaye, aur agar masah karna bhi mumkin na ho to Tayammum kare, ye ba tarteeb hoga.

Aur agar kisi aisi cheez se zakhm dhaka hua ho jise dhakna jaayez hai to us par sirf masah kiya jayega aur agar dhaka hua hone ke bawajud us par masah karna nuqsande ho to phir khula hone ki surat ki tarah zakhm par tayammum kiya jaaye, fuqaha Rahimahullah ne yahi bayan kiya hai.
📗(Shara Al Mumti, 1/169)

🔴Sheikh Saleh Fawzan Hafizullah se sawal kiya gaya :

Sawal :
Doctor ne mere haath par sui wali jagah se khoon nikalne ki wajah se us jagah ko saaf kar ke uspar patti lapet diya aur jab mai usey utarta hu to khoon reesna shuru ho jata hai, sirf Raat ke waqt khun band hota hai, patti haath par lipti rahti hai. Kya wuzu karte waqt mere liye us patti par masah karna jayez hai, halaki patti wuzu karke nahi bandhi gayi, balki khoon laga hua tha is halat me patti bandhi gayi thi. Aur masah karne ka tareeqa kya hoga❓

Jawab📗Sheikh ka jawab tha :

✔Zakhm par baandhi gayi patti nahi kholi jaayegi aur khaskar ke jab patti utarna nuqsande ho aur khoon nikalna shuru ho jaaye, to us halat me patti utarna jayez nahi kyunki usme apko khatra hai isliye aap usey usi tarah rahne de, aur jab wuzu kare to jis haath par patti nahi usey dhoye, lekin jis par patti bandhi hai, haath bhigo kar us patti ke upar masah karna kaafi hai.
Zarurat ke bina par jitni der bhi ye patti maujood rahe  masah karna hi kaafi hai, chahe kai auqaat ya kai ayyam tak(chahe kitne bhi waqt tak) aise hi ho. Patti ke liye shart nahi ke wo wuzu karke bandhi jaaye. Sahi yahi hai ke sui ki jagah par chahe zakhm ki jagah par agar khoon bhi ho to us jagah wuzu karna shart nahi.
📘(Al-Muntaqa min Fataawa al-Shaykh al-Fawzaan, 5/15)

📮MOZON(Socks) PAR MASAH KARNE KA MASNOON TAREEQA

📮MOZON(Socks) PAR MASAH KARNE KA MASNOON TAREEQA

Bismillahhirrahmanirrahim

Masah karne ka masnoon tareeqa ye hai ke : apne dono haatho ki ungliyan khol kar paaon ki ungliyon ke paas rakhe, aur phir daayein aur baayein dono haatho ko pindli(above the ankle) ki taraf ek hi waqt me le aaye, aur masah sirf ek hi baar kiya jaaye.

🔴Sheikh ibn Usaimeen Rahimahullah kahte hain :

Masah mozon ke upari wale hisse pe kiya jayega, to isliye wo apna haath sirf paaon ki ungliyon se pindli ki taraf phere, aur masah dono haatho se dono paaon par kiya jayega yaani jis tarah kaano ka masah kiya jata hai usi tarah daayein(right) haath se daayein paaon aur usi waqt baayein(left) haath se baayein paaon ka masah kare, kyunki sunnat se yahi zahir hota hai.

✔☘Mughira bin Sho’ba Radiallahu anhu se rivayat hai ki Rasool’Allah sallallaho alaihi wasallam ne wuzu kiya, mai jhuka taki Aap ke (paaon se) moze utaaru, Aap sallallaho alaihi wasallam ne farmaya inhe rahne do inko jab (paaon me) daala tha to paun paak the,
chunanche Rasool’Allah sallallaho alaihi wasallam ne un dono par masah kiya. ”
📚(Sahih Bukhari, 206)
📚(Sahih Muslim, 274)
📚(Ahmad, 251)

Is hadees se ye zahir hai ke Inhone ye nahi kaha ke pahle daayein se shuru kiya, balki ye kaha ke dono par masah kiya, to isliye sunnat ka zahir yahi hai, haan agar ye farz kare kisi ka ek haath kaam nahi karta to phir wo baayein paaon se pahle daayein paaon ka masah kar sakta hai.
Bahut se log dono haath se daayein paaon aur phir dono haatho se baayein paaon par masah karte hain, ye aisa amal hai mere ilm ke mutabiq to iski koi daleel nahin milti..
Kisi bhi tareeqe par masah sirf mozon ke upar hi karna  kaafi hai.
📜🗞(Fataawa al-Mar’ah al-Muslimah, vol. 1, p. 250)

Mozon ki dono sides aur agli pichli taraf masah nahi kiya jayega kyunki iss silsile me kuch bhi sahi baat sabit nahi.

🔴Sheikh Ibn Usaimeen Rahimahullah kahte hain :

Koi kahne wala ye kah sakta hai ke : muamle ka zahiri to yahi hai ke moze ki nichli hisse ka masah karna zyada behtar hai, Kyunki mitti aur gandagi me to wahi hissa lagta hai, lekin jab ham ispar gaur wa fikr karte hain to hame yahi pata chalta hai ke moze ke upar wale hisse ka masah karna afzal hai,aur aqal bhi isi baat ko sabit karti hai, Kyunki is maseh se murad safai nahi balki Isse to ibadat murad hai, aur agr ham moze ke nichle hisse me masah kare to ye uske gande hone ka zariya banega.
📘(Shara Al – Mumti, 213)

📮MOZON(Socks) PAR MASAH KARNA

📮MOZON(Socks) PAR MASAH KARNA

Bismillahhirrahmanirrahim

Mozon par masah karna Rasool’Allah sallallaho alaihi wasallam ki sunnat hai, jis shaks ne pairo me moze pahen rakhe ho uske liye afzal yahi hai ke wo pairo ko dhone ke liye unhe nikalne ke bajaye unpar masah karle. Kyunki Rasool’Allah sallallaho alaihi wasallam ne do chizo me se hamesha asaan chiz hi ikhteyaar ki. Jaise ke Hadees me hai ke :

✔☘Rasool’Allah sallallaho alaihi wasallam se jab bhi do chizo me se kisi ek ke ikhteyaar karne ke liye kaha gaya to Aap sallallaho alaihi wasallam ne hamesha usi ko ikhteyaar farmaya jis me Aap sallallaho alaihi wasallam ko zyada aasani maalum hui basharte ke usme koi gunah na ho. Kyunki agar usme gunah ka koi shubha bhi hota to Aap sallallaho alaihi wasallam usse sab se zyada door rahte.
📚(Sahih Bukhari, 3560)
📚(Sahih Muslim, 2327)

✔Sheikhul islam ibn Taymiyah aur unke shagird ibn Qayyim Rahimahullah ne bhi yahi ikhteyaar kiya hai ke :

Har ek ke liye afzal yahi hai ke wo us par amal kare jo uski halat ke mafiq ho, to isliye agar to usne moze pahen rakhe ho to uske liye masah karna afzal hai, aur agar uske paaon nange hain to dhona afzal hai, aur fir moze to pahene hi isliye jate hai ke un par masah kiya jaaye.

🚩Iski daleel

✔☘Mughira bin Sho’ba Radiallahu anhu ki hadees hai ke jab unhone wuzu me paaon dhone ke liye Rasool’Allah sallallaho alaihi wasallam ke moze utarna chaha to Rasool’Allah sallallaho alaihi wasallam ne unhe farmaya tha :
“Rahne do! Kyunki maine ye moze taharat(wuzu/paaki) ke baad pahne the, chunache Rasool’Allah sallallaho alaihi wasallam ne uspar masah kiya.”
📚(Sahih Bukhari, 206)
📚(Sahih Muslim, 274)

🚩Tirmizi me bhi iski daleel maujood hai

✔☘Saffwan bin Asaal Radiallahu anhu bayan karte hai ke : Jab ham safar me hote to Rasool’Allah sallallaho alaihi wasallam hame hukm dete ke ham teen din tak apne moze na utare illa ye ke halat e janabat ho jaaye, lekin qazaye hazat(answering the call of nature) aur neend ki wajah se utarne ki zarurat nahi.”
📚(Sunan Tirmizi, 96)hasan

Lehaza in daleelo se ye malum chalta hai ke jisne moze pahen rakhe hai uske liye mozon par masah karna hi afzal hai.
📒Al-Insaaf (1/378)

🔴Mozon par masah ki muddat

✔☘Shareeh bin Haani  farmate hain: Main ne Ali Radiallahu anhu se mazon par masah karne ke muddat ke muta’alliq poocha to Ali Radiallahu anhu ne farmaya: Rasool Allah ne musafir(traveller) ke liye (masah ki muddat) teen din- raat aur muqeem(resident) ke liye ek din-raat muqarrar farmai hai.”
📚(Muslim: al Tahaara, 276)

🔴Mozon ke upari hisse pe masah karna

✔☘Ali Radiallahu anhu bayan karte hai ke maine khud Rasool’Allah sallallaho alaihi wasallam ko pair(feets) ke baalaai hisse( upari hisse) pe masah karte dekha hai.
📚(Abu Dawud, 162)
📚(Darqutni 1/199)
📚(Baihaqi, 1/296)

🔘Yaad rakhe wali baatein

🚩1. Mozon ko taharat aur wuzu ki halat me hi panna hai.

🚩2. Mozon paak hona chhaiye unpe najasat na lagi ho.

📮TAYAMMUM AUR USKE MASAIL

📮TAYAMMUM AUR USKE MASAIL

Bismillahhirrahmanirrahim

🔴Tayammum

“Paani na milne ki surat ya paani ke istemal par nuqsan ka darr hone ki surat me, mitti se paaki hasil karne ko tayammum kahte hai.”

🔴Farman e ILAHI

“Ai  imaan waalo! jab tum namaaz ke liye utho to apne mu ko aur apne haatho ko kuhniyo samet dhulo, apne saro ka masah karo, aur apne paao ko takhno samet dhulo aur agar tum janaabat ki haalat mein ho to ghusl karlo, haan agar tum bimaar ho ya safar ki haalat mein ho ya tum mein se koyi haajat zaruri(answering the call of nature) se faarigh ho kar aaya ho, ya tum aurto se mile ho aur tumhe paani na mile to tum paak mitti se tayammum karlo, usse apne chehro aur haatho par mal lo, Allah ta’ala tum par kisi qism ki tangi daalna nahi chaahta, balke uska iraada tumhe paak karne ka aur tumhe apni bharpoor nemat dene ka hai, ta ke tum shukar ada karte raho”
📗(Surah Maidah 5 : 6)

🔵Tayammum ka tareeqa

Wuzu aur ghusl me se jis ke liye tayammum karna chahte ho uski dil me niyat kare.
✔☘Rasool’Allah sallallaho alaihi sallallaho alaihi wasallam ne farmaya tamaam amalo ka daromadar niyat pe hai.”
📚(Sahih Bukhari, 01)

🔴Tayammum me Chehre aur haatho ka masah karna kaafi hai

(Bismillah padhne ke bad) mitti par haath mare aur(phunkne ke bad) chehre aur hatheliyo ka masah kare.
📚(Sahih Bukhari, 339)
📚(Sahih Muslim 368)

✔☘Rasool’Allah sallallaho alaihi wasallam ne Ammar Radiallahu anhu se kaha ke ‘Ulte haath se seedhe haath par aur seedhe haath se ulte haath par masah karo phir dono’n hatho’n se chehre ka masah karo.’
📚(Abu Dawood: al Tahaara 321)

🔴Mitti par sirf ek baar hi haatho ko marna

✔☘Rasool’Allah sallallaho alaihi wasallam ka irshad hai :
“Tayammum ke liye mitti par sirf ek martabah hi haath marna hai.”
📚(Abu Dawud, 327)

✒Yaad rahe ke Tayammum ki mitti par do baar haath marna kisi bhi sahi hadees se nahi sabit hai. Isliye sahi tareeqa yehi hai ke ek bar hi haath mara jaye.

🔴Paani mil jaane par wuzu hi karne me khair hai

Jin chizo se wuzu toot jata hai un chizo se tayammum bhi toot jata hai. Isi tarah paani mil jane par tayammum bhi khatam ho jata hai.
✔☘Rasool’Allah Sallallahu Alaihi Wasallam ka irshad hai :
“Paak mitti musalmano ko paak karne wali hai, agarche das saal usey paani na mile(lekin) jab paani mayassar aa jaye to usey apne jism se chuwaaye kyunki khair wa bhalai isi me hai.”
📚(Abu Dawud, 332)

🔴Zameen ki upri sateh se tayammum karna

Quran Majeed me “Say’eed” (say’eed tayammum karne ki chiz hai jiska nam quran me aya hai) se tayammum karne ka hukm aya hai jiske maane aksar a’aimma e lughat(yani scholars of dictionary) ke mutabiq zameen ki upari satah ke hai isliye har us chiz se tayammum durust hoga jo zameen ki satah ho.
📒(Fiqhul hadees, 129)

✒Lekin yaad rahe ke mitti ke maujood na hone ki surat me kyunki mitti ke “Say’eed” hone pe saare ke saare ulemaa agree hai ke zameen ki upari satah mitti hi hai. 

🔴Diwaar se tayammum karna jayez hai

✔☘Abu juhaim Radiallahu anhu se rivayat hai :
“Rasool’Allah sallallaho alaihi wasallam be’re jamal ki taraf se aaye,  Aap se ek admi mila, usne Aap sallallaho alaihi wasallam ko Salam kiya, Aap sallallaho alaihi wasallam ne salam ka jawab nahi diya yaha tak ke ek diwaar ke pas aaye, phir apne chehre aur haath ka masah kiya(tayammum kiya) aur  salam ka jawab diya.”
📚(Sahih Bukhari, 337)
📚(Sahih Muslim, 369)

🔴Tayammum se namaz adaa karlene ke baad pani milna🔴

✔☘Abu Saeed Radiallahu anhu se riwayat hai ke do admiyo ne tayammum kiya aur namaz padhli phir inhe paani mil gaya aur abhi namaz ka waqt baaqi tha, bas inme se ek ne wuzu kiya aur namaz lautaai aur doosre ne namaz na lautaai, phir inhone Rasool’Allah sallallaho alaihi wasallam se poocha bas aap ne is shaqs se kaha jis ne namaz nahi lautaai thee ke ‘tum ne sunnat par amal kiya aur tumhari (tayammum wali) namaz tumhare liye kaafi hai aur doosre shaqs se kaha jis ne namaz lautaai thee ke tere liye zyada ajar hai.’
📚(Nasai, al Ghusl 433)Sahih

📮WUZU KE MUTALLIQ DEEGAR(other) MASAIL

📮WUZU KE MUTALLIQ DEEGAR(other) MASAIL

Bismillahhirrahmanirrahim

1.🚩Badan ke wuzu wale hisse ko ek ek baar ya do do baar dhona bhi durust hai.
📚(Bukhari 157-158)

2.🚩Teen se zyada baar dhona gunah hai, Rasool’Allah sallallaho alaihi wasallam ka farman hai
“Jisne teen se zyada baar dhoya usne galat kiya, ziyaadti kee aur zulm kiya. ”
📚(ibn Majah, 422)
📚(Nasai, 2/3180)

3.🚩Agar koi pahle se bawuzu ho to salah ke liye dobara wuzu karna zaruri nahi, Rasool’Allah sallallaho alaihi wasallam ne farmaya
” Wuzu sirf be wuzu hone ki surat me hi (lazim) hai. ”
📚(Tirmizi, 422)
📚(Nasai,1/188)
📚(Ahmed 2/3180)

Lekin har Namaz ke liye taza wuzu mustahab hai,
Anas Radiallahu anhu se rivayat hai ki
” Ham ek hi wuzu se kai namaz adaa kar lete the jabki Rasool’Allah sallallaho alaihi wasallam har namaz ke liye wuzu karte the. ”
📚(Sahih Muslim, 227)

✒Yaad rahe wuzu par wuzu karne ki fazeelat se Mutalliq koi sahi rivayat maujood nahi hai.

4.🚩Wuzu se pahle miswak karna mustahab hai.
Rasool’Allah sallallaho alaihi wasallam ka irshaad hai
” Agar mujhe meri ummat ki mushaqqat wa takleef ka andesha na hota to mai har namaz ke sath miswak karne ka hukm(wajoobi taur par) deta.
📚(Sahih Bukhari, 887)
📚(Sahih Muslim, 1252)

Huzaifa Radiallahu anhu se rivayat hai ki Rasool’Allah Sallallahu Alaihi Wasallam jab tahajjud ke liye uthte to miswak se apna muh saaf farmate.”
📚(Sahih Bukhari, 245)
📚(Sahih Muslim, 255)

Aap sallallaho alaihi wasallam ka farman hai.
“Miswak muh ki safai ka zariya aur parwardigar ki Razamandi ka sabab hai. ”
📚(Bukhari Mu’allaqan)
📚(Ahmed 6/47)
📚(Sahee Nasai, 5)

5.🚩Wuzu me tarteeb(serial wise/silsilewar) waajib hai, Rasool’Allah sallallaho alaihi wasallam ne ek dehati se farmaya :
” Us tarah wuzu karo jaisa Allah Ta’ala ne tumhe wuzu karne ka hukm diya hai. ”
📚(Abu a’vana 1/253)
📚(Baihaqi,1/83)

✒Yani ke wuzu tarteeb(serial wise/silsilewar) me hi karna hai, jaise ke pahle hatho ko dhona hai to hatho ko hi dhoya jayega, naaki pahle kulli ki jayegi, yani ke ulta wuzu karne se wuzu nahi hoga.

6.🚩Wuzu me tarteeb ki tarah muwaalaat(wuzu wale body parts ko ek ke bad ek dhona) bhi wajib hai.
Umar Radiallahu anhu se rivayat hai ki” Ek admi ne wuzu kiya to uske paao par nakhun ke barabar jagah khushk rah gayi. Rasool’Allah sallallaho alaihi wasallam ne usey dekha to farmaya :
Wapas jaao aur achhi tarah wuzu karo, chunache wo wapas gaya aur (dobara) wuzu karne ke baad namaz adaa ki. ”
📚(Sahih Muslim 243)
📚(Ibn Majah, 666)

✒Isse ye bhi malum hua ke wuzu wale hisso me se agar koi hisse me agar nakhun ke barabar bhi hissa khushk rah jaaye to wuzu nahi hoga.

7.🚩Rasool’Allah sallallaho alaihi wasallam se poore sar ka masah karna hi sabit hai,sar ke kuch hisse ka masah karna sabit nahi,haa agar sar par a’mamah(pagdi) ho to sar ke agle hisse ka masah karke a’mamah(pagdi) par masah mukammal kiya ja sakta hai.
✔Mughira bin Shoba Radiallahu anhu se rivayat hai
“Rasool’Allah sallallaho alaihi wasallam ne wuzu kiya aur peshani aur a’mamah(pagdi) par masah kiya.”
📚(Sahih Muslim, 274)

8.🚩Isi tarah Amr Bin Uamayya Azzamri Radiallahu anhu farmate hai:
Maine Rasool’Allah sallallaho alaihi wasallam ko dekha Aap sallallaho alaihi wasallam apni pagdi aur apne mozo pe masah kiya karte the.”
📚(Bukhari, 205)

9.🚩Mustaurid Bin Shaddad Radiallahu anhu bayan karte hai
“Maine Rasool’Allah sallallaho alaihi wasallam ko dekha Aap sallallaho alaihi wasallam apni paao ki ungliyo ka khilal haath ki choti ungli se kar rahe the.
📚(Abu Dawud, 148)
📚(Tirmizi, 40)

10.🚩Isi tarah Dadhi ka khilal karna bhi sunnat hai.
Usman Radiallahu anhu se rivayat ki Rasool’Allah Sallallahu Alaihi Wasallam ne wuzu kiya aur apni dadhi me khilal kiya.”
📚(Tirmizi 31)
📚( ibn Majah, 430)

Wallahualam

📮WUZOO KA TAREEQA

📮WUZOO KA TAREEQA

Bismillahhirrahmanirrahim

Wuzoo karne wala wuzoo ki dil me niyat kare,  na ke zaban se, isliye ke Rasool’Allah sallallaho alaihi wasallam se wuzoo, namaz ya kisi aur ibadat ke liye zaban se niyat karne ka suboot nahi milta, aur isliye ke Allah Ta’ala dil ki baato ko janta hai, lehaza usey mazeed khabar dene ki zarurat nahi, niyat karna farz hai.

1.🚩Sabse pahle wuzoo ke liye dil me niyat kare
Rasool’Allah sallallaho alaihi wasallam ne farmaya :
“Tamam aamaal ka daromadar niyat par hai. ”
📚(Sahih Bukhari, 01)
📚(Sahih Muslim, 1907)

2.🚩Fir Bismillah padhe kyunki Rasool’Allah sallallaho alaihi wasallam ka irshaad hai :
” jo shaks wuzoo ke waqt Allah ka naam nahi leta uska wuzoo nahi hota. ”
📚(Abu Dawood, 101)
📚(Ibn Majah, 399)
📚(Ahmad 30/41)
📚(Hakim, 1/147)

3.🚩Fir apni hatheliyo ko teen baar dhoye.
📚(Bukhari, 1910) (Muslim, 235)

4.🚩Phir teen dafa kulli kare aur naak me pani dale.
📚Sahih Bukhari(191) Sahih Muslim (235)

Note✒️ :Wazeh rahe ke kulli karne aur naak pe pani dalne ka jo Rasool’Allah sallallaho alaihi wasallam se tareeqa sabit hai wo ek hi chullu se kulli bhi ki jaye aur naak me pani bhi dala jaye.
Halaki Usman Radiallahu anhu se aur Ali Radiallahu anhu se kulli aur naak ke liye alag alag pani lena bhi sabit hai.
Lehaza Behtar ye hai ki ek hi pani se kulli bhi ki jaaye aur naak me pani bhi dala jaye lekin agar koi alag kulli aur alag naak me pani dalta hai to bhi jayez hai.
📚(Tareekh Al kabeer, ibn khuzaima, 1910)

5.🚩Phir teen martabah chehre ko dhoye, chaudaai me kaan se lekar (dusre) kaan tak aur lambaai me baalo ke ugne ki jagah se dadhi ke nichle hisse tak.
📚(Sahih Muslim, 235)

6.🚩Iske baad dono hatho ko ungliyo ke sire se lekar kohiniyo tak teen teen baar dhoye, Pahle sidhe haath ko phir ulte haath ko.
📚(Sahih Bukhari, 185)
📚(Sahih Muslim, 235)

7.🚩Phir apne sar ka masah ek baar kare, haatho ko tar karke sar ke agle hisse se masah shuroo kare aur sar ke pichle hisse (guddi) tak le jaye fir isi tarah pichhe se aage ki taraf le aaye.
📚(Sahih Bukhari, 185)
📚(Sahih Muslim, 235)

8.🚩Phir kaano ka masah bhi ek martabah kare, shahadat ki ungli se kaan ke andurooni hisse ka masah kare aur anguthe se kaan ke baheri hisse ka.
📚(Ibn Majah, 439)
📚(Tirmizi, 361)

Note✒️ :Kaano ke maseh ke liye alag se pani lena hadees se sabit nahi hai

9.🚩Aur phir akhir me dono pairo ko teen teen baar dhoye, ungliyo ke sire se takhno tak. Pahle sidhe pair ko phir ulte pair ko.
📚(Sahih Bukhari, 1934)
📚(Sahih Muslim, 236)

🔴Wuzoo ke baad ke azkaar

Umar Radiallahu anhu se rivayat hai ki Rasool’Allah Sallallahu Alaihi Wasallam ne farmaya :
Tumme se koi shaks wuzoo kare aur kamil wuzoo kare phir kahe

أَشْهَدُ أَنْ لاَ إِلَهَ إِلاَّ اللَّهُ وَحْدَهُ لاَ شَرِيكَ لَهُ وَأَشْهَدُ أَنَّ مُحَمَّدًا عَبْدُهُ وَرَسُولُهُ ‏”‏ ‏

“Mai gawahi deta hu ke Allah ke siwa koi mabud barhaq nahi, wo akele hai uska koi shareek nahi aur mai gawahi deta hu Mohammad sallallaho alaihi wasallam uske bande aur uske Rasool hai.
📚(Sahih Muslim, 234)

✔Abu Sayeed Radiallahu anhu se rivayat hai ki Rasool’Allah Sallallahu Alaihi Wasallam ne farmaya :
Jo shaks wuzoo ke baad kahe

سُبْحـانَكَ اللّهُـمَّ وَبِحَمدِك أَشْهَـدُ أَنْ لا إِلهَ إِلاّ أَنْتَ أَسْتَغْفِرُكَ وَأَتوبُ

“Ai Allah tu paak hai aur teri hi tareef hai, mai gawahi deta hu ke tere siwa koi mabud nahi, mai tujhse maghfirat chahta hu aur teri taraf ruju karta hu.”
To ye kalimaat kagaz pe likh kar uspe muhar laga diya jata hai to qiyamat tak nahi toda jata. ”
📚(Nasai, 9909)
📚(Sahiuttargheeb, 218)

🔘Yaad rakhne wali baat

🔵Gardan ka Masah karna Bidd’at hai

Gardan ka masah karna kisi bhi sahi hadees se sabit nahi hai.
📔Majmu’ulfatawa 21/127

✔Imam Nawvi Rahimahullah ne ise Bidd’at kaha hai.
📓Al majmu 1/489

📮WAZOO KI AHMIYAT AUR FAZEELAT

📮WAZOO KI AHMIYAT AUR FAZEELAT

Bismillahhirrahmanirrahim

🔴Wazoo ki ahmiyat

“Ai imaan waalo! jab tum namaaz ke liye utho to apne mu ko aur apne haatho ko kohniyo samet dhulo, apne saro ka masah karo, aur apne paao ko takhno samet dhulo…. ”
📘(Surah Maydah : 6)

✔Rasool’Allah sallallaho alaihi wasallam ne farmaya
“Wazu salah(namaz) ki kunji hai, Salah ki shuruat takbeer se hai aur uska akheer salam hai”
📚(Sahih ibn Majah, 222)

🔴Wazoo ki Fazeelat

Wazoo zahiri taharat wa safai ke alawa androon aur baatin ki safaai aur paakizgi ka zariya bhi hai.

✔Rasool’Allah sallallaho alaihi wasallam ne farmaya :
“jis waqt momin wazoo shuru karta hai phir kulli karta hai to uske muh ke gunah nikal jate hai phir jis waqt naak jhadta hai to uske naak ke gunah nikal jate hai( isi tarah jo jo aage badhte jata hai uske hath, pair aur sar ke gunah nikal jate hain) phir jab wo namaz ada karta hai aur zikr o tasbeeh se farigh hokar nikalta hai to gunaho se us tarah(paak hokar) laut ta hai jaise wo us din (paak) tha jab uski maa ne usko paida kiya tha.
📚(Sahih Muslim, 244)

✔Abu Hurairah Radiallahu anhu se rivayat hai ki Rasool’Allah sallallaho alaihi wasallam ne farmaya :
“Kya main tumhe wo cheez na batau ke jiske sabab Allah Ta’ala gunaho ko door aur darjaat ko buland karta hai?
Sahaaba ne arz kiya: Ai Allah ke Rasool sallallaho alaihi wasallam irshad farmaiye.
Aap sallallaho alaihi wasallam ne farmaya :
” Mushaqqato ke bawajood kamil wazu karna, masjido ki taraf ziyaadah(qadmo se) jana aur salah(namaz) ka intezar karna gunaho ko bilkul dho deta hai. ”
📚(Sahih Muslim, 251)

✔Rasool’Allah sallallaho alaihi wasallam se sawal kiya gaya ke aap(mahshar me)  dusri umamto ke darmiyan apni ummat ko kaise pahchanege❓to Aap sallallaho alaihi wasallam ne farmaya :
” Meri ummat ke log wazoo ke asar se Roshan(safed) chehre aur safed hath paao wale honge iss tarah unke siwa aur koi nahi hoga. ”
📚(Sahih Muslim, 247,248)

✔Abu Hurairah Radiallahu anhu se riwayat hai ke main ne apne dost Muhammad sallallaho alaihi wasallam ko ye farmate hue suna: (Jannat mein) Momin
ka zewar waha tak phahuchega jahaan tak wazu ka pani phahuchega.
📚(Muslim, 250)